(1-50-1)
उदु॒ त्य-ञ्जा॒तवे॑दस-न्दे॒वं-वँ॑हन्ति के॒तवः॑ ।
दृ॒शे विश्वा॑य॒ सूर्य॑म् ॥ 1
(1-50-1)
udu̠ tya-ñjā̠tavē̍dasa-ndē̠vaṃ va̍hanti kē̠tava̍ḥ ।
dṛ̠śē viśvā̍ya̠ sūrya̍m ॥ 1
(1-50-1)
udu̠ tya-njaa̠tavē̍dasa-ndē̠vam va̍hanti kē̠tava̍h ।
dri̠shē vishvaa̍ya̠ suurya̍m ॥ 1
अप॒ त्ये ता॒यवो॑ यथा॒ नक्ष॑त्रा यन्त्य॒क्तुभिः॑ ।
सूरा॑य वि॒श्वच॑क्षसे ॥ 2
apa̠ tyē tā̠yavō̍ yathā̠ nakṣa̍trā yantya̠ktubhi̍ḥ ।
sūrā̍ya vi̠śvacha̍kṣasē ॥ 2
apa̠ tyē taa̠yavō̍ yathaa̠ naksha̍traa yantya̠ktubhi̍h ।
suuraa̍ya vi̠shvacha̍kshasē ॥ 2
अदृ॑श्रमस्य के॒तवो॒ वि र॒श्मयो॒ जना॒ङ् अनु॑ ।
भ्राज॑न्तो अ॒ग्नयो॑ यथा ॥ 3
adṛ̍śramasya kē̠tavō̠ vi ra̠śmayō̠ janā̠ṅ anu̍ ।
bhrāja̍ntō a̠gnayō̍ yathā ॥ 3
adri̍shramasya kē̠tavō̠ vi ra̠shmayō̠ janaa̠n anu̍ ।
bhraaja̍ntō a̠gnayō̍ yathaa ॥ 3
त॒रणि॑र्वि॒श्वद॑र्शतो ज्योति॒ष्कृद॑सि सूर्य ।
विश्व॒मा भा॑सि रोच॒नम् ॥ 4
ta̠raṇi̍rvi̠śvada̍rśatō jyōti̠ṣkṛda̍si sūrya ।
viśva̠mā bhā̍si rōcha̠nam ॥ 4
ta̠rani̍rvi̠shvada̍rshatō jyōti̠shkrida̍si suurya ।
vishva̠maa bhaa̍si rōcha̠nam ॥ 4
प्र॒त्यङ् दे॒वानां॒ विशः॑ प्र॒त्यङ्ङुदे॑षि॒ मानु॑षान् ।
प्र॒त्यङ्विश्वं॒ स्व॑र्दृ॒शे ॥ 5
pra̠tyaṅ dē̠vānāṃ̠ viśa̍ḥ pra̠tyaṅṅudē̍ṣi̠ mānu̍ṣān ।
pra̠tyaṅviśvaṃ̠ sva̍rdṛ̠śē ॥ 5
pra̠tyan dē̠vaanaam̠ visha̍h pra̠tyannudē̍shi̠ maanu̍shaan ।
pra̠tyanvishvam̠ sva̍rdri̠shē ॥ 5
येना॑ पावक॒ चक्ष॑सा भुर॒ण्यन्तं॒ जना॒ँ अनु॑ ।
त्वं-वँ॑रुण॒ पश्य॑सि ॥ 6
yēnā̍ pāvaka̠ chakṣa̍sā bhura̠ṇyantaṃ̠ janā̠m̐ anu̍ ।
tvaṃ va̍ruṇa̠ paśya̍si ॥ 6
yēnaa̍ paavaka̠ chaksha̍saa bhura̠nyantam̠ janaa̠m anu̍ ।
tvam va̍runa̠ pashya̍si ॥ 6
वि द्यामे॑षि॒ रज॑स्पृ॒थ्वहा॒ मिमा॑नो अ॒क्तुभिः॑ ।
पश्य॒ञ्जन्मा॑नि सूर्य ॥ 7
vi dyāmē̍ṣi̠ raja̍spṛ̠thvahā̠ mimā̍nō a̠ktubhi̍ḥ ।
paśya̠ñjanmā̍ni sūrya ॥ 7
vi dyaamē̍shi̠ raja̍spri̠thvahaa̠ mimaa̍nō a̠ktubhi̍h ।
pashya̠njanmaa̍ni suurya ॥ 7
स॒प्त त्वा॑ ह॒रितो॒ रथे॒ वह॑न्ति देव सूर्य ।
शो॒चिष्के॑शं-विँचक्षण ॥ 8
sa̠pta tvā̍ ha̠ritō̠ rathē̠ vaha̍nti dēva sūrya ।
śō̠chiṣkē̍śaṃ vichakṣaṇa ॥ 8
sa̠pta tvaa̍ ha̠ritō̠ rathē̠ vaha̍nti dēva suurya ।
shō̠chishkē̍sham vichakshana ॥ 8
अयु॑क्त स॒प्त शु॒न्ध्युव॒-स्सूरो॒ रथ॑स्य न॒प्त्यः॑ ।
ताभि॑र्याति॒ स्वयु॑क्तिभिः ॥ 9
ayu̍kta sa̠pta śu̠ndhyuva̠-ssūrō̠ ratha̍sya na̠ptya̍ḥ ।
tābhi̍ryāti̠ svayu̍ktibhiḥ ॥ 9
ayu̍kta sa̠pta shu̠ndhyuva̠-ssuurō̠ ratha̍sya na̠ptya̍h ।
taabhi̍ryaati̠ svayu̍ktibhih ॥ 9
उद्व॒य-न्तम॑स॒स्परि॒ ज्योति॒ष्पश्य॑न्त॒ उत्त॑रम् ।
दे॒व-न्दे॑व॒त्रा सूर्य॒मग॑न्म॒ ज्योति॑रुत्त॒मम् ॥ 10
udva̠ya-ntama̍sa̠spari̠ jyōti̠ṣpaśya̍nta̠ utta̍ram ।
dē̠va-ndē̍va̠trā sūrya̠maga̍nma̠ jyōti̍rutta̠mam ॥ 10
udva̠ya-ntama̍sa̠spari̠ jyōti̠shpashya̍nta̠ utta̍ram ।
dē̠va-ndē̍va̠traa suurya̠maga̍nma̠ jyōti̍rutta̠mam ॥ 10
उ॒द्यन्न॒द्य मि॑त्रमह आ॒रोह॒न्नुत्त॑रां॒ दिव॑म् ।
हृ॒द्रो॒ग-म्मम॑ सूर्य हरि॒माणं॑ च नाशय ॥ 11
u̠dyanna̠dya mi̍tramaha ā̠rōha̠nnutta̍rāṃ̠ diva̍m ।
hṛ̠drō̠ga-mmama̍ sūrya hari̠māṇaṃ̍ cha nāśaya ॥ 11
u̠dyanna̠dya mi̍tramaha aa̠rōha̠nnutta̍raam̠ diva̍m ।
hri̠drō̠ga-mmama̍ suurya hari̠maanam̍ cha naashaya ॥ 11
शुके॑षु मे हरि॒माणं॑ रोप॒णाका॑सु दध्मसि ।
अथो॑ हारिद्र॒वेषु॑ मे हरि॒माणं॒ नि द॑ध्मसि ॥ 12
śukē̍ṣu mē hari̠māṇaṃ̍ rōpa̠ṇākā̍su dadhmasi ।
athō̍ hāridra̠vēṣu̍ mē hari̠māṇaṃ̠ ni da̍dhmasi ॥ 12
shukē̍shu mē hari̠maanam̍ rōpa̠naakaa̍su dadhmasi ।
athō̍ haaridra̠vēshu̍ mē hari̠maanam̠ ni da̍dhmasi ॥ 12
उद॑गाद॒यमा॑दि॒त्यो विश्वे॑न॒ सह॑सा स॒ह ।
द्वि॒षन्तं॒ मह्यं॑ र॒न्धय॒न्मो अ॒ह-न्द्वि॑ष॒ते र॑धम् ॥ 13
uda̍gāda̠yamā̍di̠tyō viśvē̍na̠ saha̍sā sa̠ha ।
dvi̠ṣantaṃ̠ mahyaṃ̍ ra̠ndhaya̠nmō a̠ha-ndvi̍ṣa̠tē ra̍dham ॥ 13
uda̍gaada̠yamaa̍di̠tyō vishvē̍na̠ saha̍saa sa̠ha ।
dvi̠shantam̠ mahyam̍ ra̠ndhaya̠nmō a̠ha-ndvi̍sha̠tē ra̍dham ॥ 13
(1-115-01)
चि॒त्र-न्दे॒वाना॒मुद॑गा॒दनी॑कं॒ चक्षु॑र्मि॒त्रस्य॒ वरु॑णस्या॒ग्नेः ।
आप्रा॒ द्यावा॑पृथि॒वी अ॒न्तरि॑क्षं॒ सूर्य॑ आ॒त्मा जग॑तस्त॒स्थुष॑श्च ॥ 14
(1-115-01)
chi̠tra-ndē̠vānā̠muda̍gā̠danī̍kaṃ̠ chakṣu̍rmi̠trasya̠ varu̍ṇasyā̠gnēḥ ।
āprā̠ dyāvā̍pṛthi̠vī a̠ntari̍kṣaṃ̠ sūrya̍ ā̠tmā jaga̍tasta̠sthuṣa̍ścha ॥ 14
(1-115-01)
chi̠tra-ndē̠vaanaa̠muda̍gaa̠danii̍kam̠ chakshu̍rmi̠trasya̠ varu̍nasyaa̠gnēh ।
aapraa̠ dyaavaa̍prithi̠vii a̠ntari̍ksham̠ suurya̍ aa̠tmaa jaga̍tasta̠sthusha̍shcha ॥ 14
सूर्यो॑ दे॒वीमु॒षसं॒ रोच॑मानां॒ मर्यो॒ न योषा॑म॒भ्ये॑ति प॒श्चात् ।
यत्रा॒ नरो॑ देव॒यन्तो॑ यु॒गानि॑ वितन्व॒ते प्रति॑ भ॒द्राय॑ भ॒द्रम् ॥ 15
sūryō̍ dē̠vīmu̠ṣasaṃ̠ rōcha̍mānāṃ̠ maryō̠ na yōṣā̍ma̠bhyē̍ti pa̠śchāt ।
yatrā̠ narō̍ dēva̠yantō̍ yu̠gāni̍ vitanva̠tē prati̍ bha̠drāya̍ bha̠dram ॥ 15
suuryō̍ dē̠viimu̠shasam̠ rōcha̍maanaam̠ maryō̠ na yōshaa̍ma̠bhyē̍ti pa̠shchaat ।
yatraa̠ narō̍ dēva̠yantō̍ yu̠gaani̍ vitanva̠tē prati̍ bha̠draaya̍ bha̠dram ॥ 15
भ॒द्रा अश्वा॑ ह॒रित॒-स्सूर्य॑स्य चि॒त्रा एत॑ग्वा अनु॒माद्या॑सः ।
न॒म॒स्यन्तो॑ दि॒व आ पृ॒ष्ठम॑स्थुः॒ परि॒ द्यावा॑पृथि॒वी य॑न्ति स॒द्यः ॥ 16
bha̠drā aśvā̍ ha̠rita̠-ssūrya̍sya chi̠trā ēta̍gvā anu̠mādyā̍saḥ ।
na̠ma̠syantō̍ di̠va ā pṛ̠ṣṭhama̍sthu̠ḥ pari̠ dyāvā̍pṛthi̠vī ya̍nti sa̠dyaḥ ॥ 16
bha̠draa ashvaa̍ ha̠rita̠-ssuurya̍sya chi̠traa ēta̍gvaa anu̠maadyaa̍sah ।
na̠ma̠syantō̍ di̠va aa pri̠shthama̍sthu̠h pari̠ dyaavaa̍prithi̠vii ya̍nti sa̠dyah ॥ 16
तत्सूर्य॑स्य देव॒त्व-न्तन्म॑हि॒त्व-म्म॒ध्या कर्तो॒र्वित॑तं॒ स-ञ्ज॑भार ।
य॒देदयु॑क्त ह॒रितः॑ स॒धस्था॒दाद्रात्री॒ वास॑स्तनुते सि॒मस्मै॑ ॥ 17
tatsūrya̍sya dēva̠tva-ntanma̍hi̠tva-mma̠dhyā kartō̠rvita̍taṃ̠ sa-ñja̍bhāra ।
ya̠dēdayu̍kta ha̠rita̍-ssa̠dhasthā̠dādrātrī̠ vāsa̍stanutē si̠masmai̍ ॥ 17
tatsuurya̍sya dēva̠tva-ntanma̍hi̠tva-mma̠dhyaa kartō̠rvita̍tam̠ sa-nja̍bhaara ।
ya̠dēdayu̍kta ha̠rita̍-ssa̠dhasthaa̠daadraatrii̠ vaasa̍stanutē si̠masmai̍ ॥ 17
तन्मि॒त्रस्य॒ वरु॑णस्याभि॒चक्षे॒ सूर्यो॑ रू॒प-ङ्कृ॑णुते॒ द्योरु॒पस्थे॑ ।
अ॒न॒न्तम॒न्यद्रुश॑दस्य॒ पाजः॑ कृ॒ष्णम॒न्यद्ध॒रित॒-स्स-म्भ॑रन्ति ॥ 18
tanmi̠trasya̠ varu̍ṇasyābhi̠chakṣē̠ sūryō̍ rū̠pa-ṅkṛ̍ṇutē̠ dyōru̠pasthē̍ ।
a̠na̠ntama̠nyadruśa̍dasya̠ pāja̍ḥ kṛ̠ṣṇama̠nyaddha̠rita̠-ssa-mbha̍ranti ॥ 18
tanmi̠trasya̠ varu̍nasyaabhi̠chakshē̠ suuryō̍ ruu̠pa-nkri̍nutē̠ dyōru̠pasthē̍ ।
a̠na̠ntama̠nyadrusha̍dasya̠ paaja̍h kri̠shnama̠nyaddha̠rita̠-ssa-mbha̍ranti ॥ 18
अ॒द्या दे॑वा॒ उदि॑ता॒ सूर्य॑स्य॒ निरंह॑सः पिपृ॒ता निर॑व॒द्यात् ।
तन्नो॑ मि॒त्रो वरु॑णो मामहन्ता॒मदि॑ति॒-स्सिन्धुः॑ पृथि॒वी उ॒त द्यौः ॥ 19
a̠dyā dē̍vā̠ udi̍tā̠ sūrya̍sya̠ niraṃha̍saḥ pipṛ̠tā nira̍va̠dyāt ।
tannō̍ mi̠trō varu̍ṇō māmahantā̠madi̍ti̠-ssindhu̍ḥ pṛthi̠vī u̠ta dyauḥ ॥ 19
a̠dyaa dē̍vaa̠ udi̍taa̠ suurya̍sya̠ niramha̍sah pipri̠taa nira̍va̠dyaat ।
tannō̍ mi̠trō varu̍nō maamahantaa̠madi̍ti̠-ssindhu̍h prithi̠vii u̠ta dyauh ॥ 19
(1-164-46)
इन्द्रं॑ मि॒त्रं-वँरु॑णम॒ग्निमा॑हु॒रथो॑ दि॒व्य-स्स सु॑प॒र्णो ग॒रुत्मा॑न् ।
एकं॒ सद्विप्रा॑ बहु॒धा व॑दन्त्य॒ग्निं-यँ॒म-म्मा॑त॒रिश्वा॑नमाहुः ॥ 20
(1-164-46)
indraṃ̍ mi̠traṃ varu̍ṇama̠gnimā̍hu̠rathō̍ di̠vya-ssa su̍pa̠rṇō ga̠rutmā̍n ।
ēkaṃ̠ sadviprā̍ bahu̠dhā va̍dantya̠gniṃ ya̠ma-mmā̍ta̠riśvā̍namāhuḥ ॥ 20
(1-164-46)
indram̍ mi̠tram varu̍nama̠gnimaa̍hu̠rathō̍ di̠vya-ssa su̍pa̠rnō ga̠rutmaa̍n ।
ēkam̠ sadvipraa̍ bahu̠dhaa va̍dantya̠gnim ya̠ma-mmaa̍ta̠rishvaa̍namaahuh ॥ 20
कृ॒ष्ण-न्नि॒यानं॒ हर॑य-स्सुप॒र्णा अ॒पो वसा॑ना॒ दिव॒मुत्प॑तन्ति ।
त आव॑वृत्र॒न्त्सद॑नादृ॒तस्यादिद्घृ॒तेन॑ पृथि॒वी व्यु॑द्यते ॥ 21
kṛ̠ṣṇa-nni̠yānaṃ̠ hara̍ya-ssupa̠rṇā a̠pō vasā̍nā̠ diva̠mutpa̍tanti ।
ta āva̍vṛtra̠ntsada̍nādṛ̠tasyādidghṛ̠tēna̍ pṛthi̠vī vyu̍dyatē ॥ 21
kri̠shna-nni̠yaanam̠ hara̍ya-ssupa̠rnaa a̠pō vasaa̍naa̠ diva̠mutpa̍tanti ।
ta aava̍vritra̠ntsada̍naadri̠tasyaadidghri̠tēna̍ prithi̠vii vyu̍dyatē ॥ 21
(4-040-05)
हं॒स-श्शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तम् ॥ 22
(4-040-05)
haṃ̠sa-śśu̍chi̠ṣadvasu̍rantarikṣa̠saddhōtā̍ vēdi̠ṣadati̍thirdurōṇa̠sat ।
nṛ̠ṣadva̍ra̠sadṛ̍ta̠sadvyō̍ma̠sada̠bjā gō̠jā ṛ̍ta̠jā a̍dri̠jā ṛ̠tam ॥ 22
(4-040-05)
ham̠sa-shshu̍chi̠shadvasu̍rantariksha̠saddhōtaa̍ vēdi̠shadati̍thirdurōna̠sat ।
nri̠shadva̍ra̠sadri̍ta̠sadvyō̍ma̠sada̠bjaa gō̠jaa ri̍ta̠jaa a̍dri̠jaa ri̠tam ॥ 22
(5-040-05)
यत्त्वा॑ सूर्य॒ स्व॑र्भानु॒स्तम॒सावि॑ध्यदासु॒रः ।
अक्षे॑त्रवि॒द्यथा॑ मु॒ग्धो भुव॑नान्यदीधयुः ॥ 23
(5-040-05)
yattvā̍ sūrya̠ sva̍rbhānu̠stama̠sāvi̍dhyadāsu̠raḥ ।
akṣē̍travi̠dyathā̍ mu̠gdhō bhuva̍nānyadīdhayuḥ ॥ 23
(5-040-05)
yattvaa̍ suurya̠ sva̍rbhaanu̠stama̠saavi̍dhyadaasu̠rah ।
akshē̍travi̠dyathaa̍ mu̠gdhō bhuva̍naanyadiidhayuh ॥ 23
(7-060-01)
यद॒द्य सू॑र्य॒ ब्रवो-ऽना॑गा उ॒द्यन्मि॒त्राय॒ वरु॑णाय स॒त्यम् ।
व॒य-न्दे॑व॒त्रादि॑ते स्याम॒ तव॑ प्रि॒यासो॑ अर्यमन्गृ॒णन्तः॑ ॥ 24
(7-060-01)
yada̠dya sū̍rya̠ bravō-'nā̍gā u̠dyanmi̠trāya̠ varu̍ṇāya sa̠tyam ।
va̠ya-ndē̍va̠trādi̍tē syāma̠ tava̍ pri̠yāsō̍ aryamangṛ̠ṇanta̍ḥ ॥ 24
(7-060-01)
yada̠dya suu̍rya̠ bravō-'naa̍gaa u̠dyanmi̠traaya̠ varu̍naaya sa̠tyam ।
va̠ya-ndē̍va̠traadi̍tē syaama̠ tava̍ pri̠yaasō̍ aryamangri̠nanta̍h ॥ 24
(7-062-01)
उत्सूर्यो॑ बृ॒हद॒र्चींष्य॑श्रेत्पु॒रु विश्वा॒ जनि॑म॒ मानु॑षाणाम् ।
स॒मो दि॒वा द॑दृशे॒ रोच॑मानः॒ क्रत्वा॑ कृ॒त-स्सुकृ॑तः क॒र्तृभि॑र्भूत् ॥ 25
(7-062-01)
utsūryō̍ bṛ̠hada̠rchīṃṣya̍śrētpu̠ru viśvā̠ jani̍ma̠ mānu̍ṣāṇām ।
sa̠mō di̠vā da̍dṛśē̠ rōcha̍māna̠ḥ kratvā̍ kṛ̠ta-ssukṛ̍taḥ ka̠rtṛbhi̍rbhūt ॥ 25
(7-062-01)
utsuuryō̍ bri̠hada̠rchiimshya̍shrētpu̠ru vishvaa̠ jani̍ma̠ maanu̍shaanaam ।
sa̠mō di̠vaa da̍drishē̠ rōcha̍maana̠h kratvaa̍ kri̠ta-ssukri̍tah ka̠rtribhi̍rbhuut ॥ 25
स सू॑र्य॒ प्रति॑ पु॒रो न॒ उद्गा॑ ए॒भि-स्स्तोमे॑भिरेत॒शेभि॒रेवैः॑ ।
प्र नो॑ मि॒त्राय॒ वरु॑णाय वो॒चो-ऽना॑गसो अर्य॒म्णे अ॒ग्नये॑ च ॥ 26
sa sū̍rya̠ prati̍ pu̠rō na̠ udgā̍ ē̠bhi-sstōmē̍bhirēta̠śēbhi̠rēvai̍ḥ ।
pra nō̍ mi̠trāya̠ varu̍ṇāya vō̠chō-'nā̍gasō arya̠mṇē a̠gnayē̍ cha ॥ 26
sa suu̍rya̠ prati̍ pu̠rō na̠ udgaa̍ ē̠bhi-sstōmē̍bhirēta̠shēbhi̠rēvai̍h ।
pra nō̍ mi̠traaya̠ varu̍naaya vō̠chō-'naa̍gasō arya̠mnē a̠gnayē̍ cha ॥ 26
वि नः॑ स॒हस्रं॑ शु॒रुधो॑ रदन्त्वृ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒म-न्नो॑ अ॒र्कमा नः॒ कामं॑ पूपुरन्तु॒ स्तवा॑नाः ॥ 27
vi na̍-ssa̠hasraṃ̍ śu̠rudhō̍ radantvṛ̠tāvā̍nō̠ varu̍ṇō mi̠trō a̠gniḥ ।
yachCha̍ntu cha̠ndrā u̍pa̠ma-nnō̍ a̠rkamā na̠ḥ kāmaṃ̍ pūpurantu̠ stavā̍nāḥ ॥ 27
vi na̍-ssa̠hasram̍ shu̠rudhō̍ radantvri̠taavaa̍nō̠ varu̍nō mi̠trō a̠gnih ।
yachCha̍ntu cha̠ndraa u̍pa̠ma-nnō̍ a̠rkamaa na̠h kaamam̍ puupurantu̠ stavaa̍naah ॥ 27
(7-063-01)
उद्वे॑ति सु॒भगो॑ वि॒श्वच॑क्षा॒-स्साधा॑रण॒-स्सूर्यो॒ मानु॑षाणाम् ।
चक्षु॑र्मि॒त्रस्य॒ वरु॑णस्य दे॒वश्चर्मे॑व॒ य-स्स॒मवि॑व्य॒क्तमां॑सि ॥ 28
(7-063-01)
udvē̍ti su̠bhagō̍ vi̠śvacha̍kṣā̠-ssādhā̍raṇa̠-ssūryō̠ mānu̍ṣāṇām ।
chakṣu̍rmi̠trasya̠ varu̍ṇasya dē̠vaścharmē̍va̠ ya-ssa̠mavi̍vya̠ktamāṃ̍si ॥ 28
(7-063-01)
udvē̍ti su̠bhagō̍ vi̠shvacha̍kshaa̠-ssaadhaa̍rana̠-ssuuryō̠ maanu̍shaanaam ।
chakshu̍rmi̠trasya̠ varu̍nasya dē̠vashcharmē̍va̠ ya-ssa̠mavi̍vya̠ktamaam̍si ॥ 28
उद्वे॑ति प्रसवी॒ता जना॑ना-म्म॒हान्के॒तुर॑र्ण॒व-स्सूर्य॑स्य ।
स॒मा॒न-ञ्च॒क्र-म्प॑र्या॒विवृ॑त्स॒न्यदे॑त॒शो वह॑ति धू॒र्षु यु॒क्तः ॥ 29
udvē̍ti prasavī̠tā janā̍nā-mma̠hānkē̠tura̍rṇa̠va-ssūrya̍sya ।
sa̠mā̠na-ñcha̠kra-mpa̍ryā̠vivṛ̍tsa̠nyadē̍ta̠śō vaha̍ti dhū̠rṣu yu̠ktaḥ ॥ 29
udvē̍ti prasavii̠taa janaa̍naa-mma̠haankē̠tura̍rna̠va-ssuurya̍sya ।
sa̠maa̠na-ncha̠kra-mpa̍ryaa̠vivri̍tsa̠nyadē̍ta̠shō vaha̍ti dhuu̠rshu yu̠ktah ॥ 29
वि॒भ्राज॑मान उ॒षसा॑मु॒पस्था॑द्रे॒भैरुदे॑त्यनुम॒द्यमा॑नः ।
ए॒ष मे॑ दे॒व-स्स॑वि॒ता च॑च्छन्द॒ य-स्स॑मा॒न-न्न प्र॑मि॒नाति॒ धाम॑ ॥ 30
vi̠bhrāja̍māna u̠ṣasā̍mu̠pasthā̍drē̠bhairudē̍tyanuma̠dyamā̍naḥ ।
ē̠ṣa mē̍ dē̠va-ssa̍vi̠tā cha̍chChanda̠ ya-ssa̍mā̠na-nna pra̍mi̠nāti̠ dhāma̍ ॥ 30
vi̠bhraaja̍maana u̠shasaa̍mu̠pasthaa̍drē̠bhairudē̍tyanuma̠dyamaa̍nah ।
ē̠sha mē̍ dē̠va-ssa̍vi̠taa cha̍chChanda̠ ya-ssa̍maa̠na-nna pra̍mi̠naati̠ dhaama̍ ॥ 30
दि॒वो रु॒क्म उ॑रु॒चक्षा॒ उदे॑ति दू॒रे अ॑र्थस्त॒रणि॒र्भ्राज॑मानः ।
नू॒न-ञ्जना॒-स्सूर्ये॑ण॒ प्रसू॑ता॒ अय॒न्नर्था॑नि कृ॒णव॒न्नपां॑सि ॥ 31
di̠vō ru̠kma u̍ru̠chakṣā̠ udē̍ti dū̠rē a̍rthasta̠raṇi̠rbhrāja̍mānaḥ ।
nū̠na-ñjanā̠-ssūryē̍ṇa̠ prasū̍tā̠ aya̠nnarthā̍ni kṛ̠ṇava̠nnapāṃ̍si ॥ 31
di̠vō ru̠kma u̍ru̠chakshaa̠ udē̍ti duu̠rē a̍rthasta̠rani̠rbhraaja̍maanah ।
nuu̠na-njanaa̠-ssuuryē̍na̠ prasuu̍taa̠ aya̠nnarthaa̍ni kri̠nava̠nnapaam̍si ॥ 31
यत्रा॑ च॒क्रुर॒मृता॑ गा॒तुम॑स्मै श्ये॒नो न दीय॒न्नन्वे॑ति॒ पाथः॑ ॥ 32
yatrā̍ cha̠krura̠mṛtā̍ gā̠tuma̍smai śyē̠nō na dīya̠nnanvē̍ti̠ pātha̍ḥ ॥ 32
yatraa̍ cha̠krura̠mritaa̍ gaa̠tuma̍smai shyē̠nō na diiya̠nnanvē̍ti̠ paatha̍h ॥ 32
(7-066-14)
उदु॒ त्यद्द॑र्श॒तं-वँपु॑र्दि॒व ए॑ति प्रतिह्व॒रे ।
यदी॑मा॒शुर्वह॑ति दे॒व एत॑शो॒ विश्व॑स्मै॒ चक्ष॑से॒ अर॑म् ॥ 33
(7-066-14)
udu̠ tyadda̍rśa̠taṃ vapu̍rdi̠va ē̍ti pratihva̠rē ।
yadī̍mā̠śurvaha̍ti dē̠va ēta̍śō̠ viśva̍smai̠ chakṣa̍sē̠ ara̍m ॥ 33
(7-066-14)
udu̠ tyadda̍rsha̠tam vapu̍rdi̠va ē̍ti pratihva̠rē ।
yadii̍maa̠shurvaha̍ti dē̠va ēta̍shō̠ vishva̍smai̠ chaksha̍sē̠ ara̍m ॥ 33
शी॒र्ष्ण-श्शी॑र्ष्णो॒ जग॑तस्त॒स्थुष॒स्पतिं॑ स॒मया॒ विश्व॒मा रजः॑ ।
स॒प्त स्वसा॑र-स्सुवि॒ताय॒ सूर्यं॒ वह॑न्ति ह॒रितो॒ रथे॑ ॥ 34
śī̠rṣṇa-śśī̍rṣṇō̠ jaga̍tasta̠sthuṣa̠spatiṃ̍ sa̠mayā̠ viśva̠mā raja̍ḥ ।
sa̠pta svasā̍ra-ssuvi̠tāya̠ sūryaṃ̠ vaha̍nti ha̠ritō̠ rathē̍ ॥ 34
shii̠rshna-shshii̍rshnō̠ jaga̍tasta̠sthusha̠spatim̍ sa̠mayaa̠ vishva̠maa raja̍h ।
sa̠pta svasaa̍ra-ssuvi̠taaya̠ suuryam̠ vaha̍nti ha̠ritō̠ rathē̍ ॥ 34
तच्चक्षु॑र्दे॒वहि॑तं शु॒क्रमु॒च्चर॑त् ।
पश्ये॑म श॒रदः॑ श॒त-ञ्जीवे॑म श॒रदः॑ श॒तम् ॥ 35
tachchakṣu̍rdē̠vahi̍taṃ śu̠kramu̠chchara̍t ।
paśyē̍ma śa̠rada̍-śśa̠ta-ñjīvē̍ma śa̠rada̍-śśa̠tam ॥ 35
tachchakshu̍rdē̠vahi̍tam shu̠kramu̠chchara̍t ।
pashyē̍ma sha̠rada̍-shsha̠ta-njiivē̍ma sha̠rada̍-shsha̠tam ॥ 35
(8-101-11)
बण्म॒हाँ अ॑सि सूर्य॒ बला॑दित्य म॒हाँ अ॑सि ।
म॒हस्ते॑ स॒तो म॑हि॒मा प॑नस्यते॒-ऽद्धा दे॑व म॒हाँ अ॑सि ॥ 36
(8-101-11)
baṇma̠hām̐ a̍si sūrya̠ baḻā̍ditya ma̠hām̐ a̍si ।
ma̠hastē̍ sa̠tō ma̍hi̠mā pa̍nasyatē̠-'ddhā dē̍va ma̠hām̐ a̍si ॥ 36
(8-101-11)
banma̠haam a̍si suurya̠ baḻaa̍ditya ma̠haam a̍si ।
ma̠hastē̍ sa̠tō ma̍hi̠maa pa̍nasyatē̠-'ddhaa dē̍va ma̠haam a̍si ॥ 36
बट् सू॑र्य॒ श्रव॑सा म॒हाँ अ॑सि स॒त्रा दे॑व म॒हाँ अ॑सि ।
म॒ह्ना दे॒वाना॑मसु॒र्यः॑ पु॒रोहि॑तो वि॒भु ज्योति॒रदा॑भ्यम् ॥ 37
baṭ sū̍rya̠ śrava̍sā ma̠hām̐ a̍si sa̠trā dē̍va ma̠hām̐ a̍si ।
ma̠hnā dē̠vānā̍masu̠rya̍ḥ pu̠rōhi̍tō vi̠bhu jyōti̠radā̍bhyam ॥ 37
bat suu̍rya̠ shrava̍saa ma̠haam a̍si sa̠traa dē̍va ma̠haam a̍si ।
ma̠hnaa dē̠vaanaa̍masu̠rya̍h pu̠rōhi̍tō vi̠bhu jyōti̠radaa̍bhyam ॥ 37
(10-037-01)
नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तं स॑पर्यत ।
दू॒रे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शंसत ॥ 38
(10-037-01)
namō̍ mi̠trasya̠ varu̍ṇasya̠ chakṣa̍sē ma̠hō dē̠vāya̠ tadṛ̠taṃ sa̍paryata ।
dū̠rē̠dṛśē̍ dē̠vajā̍tāya kē̠tavē̍ di̠vaspu̠trāya̠ sūryā̍ya śaṃsata ॥ 38
(10-037-01)
namō̍ mi̠trasya̠ varu̍nasya̠ chaksha̍sē ma̠hō dē̠vaaya̠ tadri̠tam sa̍paryata ।
duu̠rē̠drishē̍ dē̠vajaa̍taaya kē̠tavē̍ di̠vaspu̠traaya̠ suuryaa̍ya shamsata ॥ 38
सा मा॑ स॒त्योक्तिः॒ परि॑ पातु वि॒श्वतो॒ द्यावा॑ च॒ यत्र॑ त॒तन॒न्नहा॑नि च ।
विश्व॑म॒न्यन्नि वि॑शते॒ यदेज॑ति वि॒श्वाहापो॑ वि॒श्वाहोदे॑ति॒ सूर्यः॑ ॥ 39
sā mā̍ sa̠tyōkti̠ḥ pari̍ pātu vi̠śvatō̠ dyāvā̍ cha̠ yatra̍ ta̠tana̠nnahā̍ni cha ।
viśva̍ma̠nyanni vi̍śatē̠ yadēja̍ti vi̠śvāhāpō̍ vi̠śvāhōdē̍ti̠ sūrya̍ḥ ॥ 39
saa maa̍ sa̠tyōkti̠h pari̍ paatu vi̠shvatō̠ dyaavaa̍ cha̠ yatra̍ ta̠tana̠nnahaa̍ni cha ।
vishva̍ma̠nyanni vi̍shatē̠ yadēja̍ti vi̠shvaahaapō̍ vi̠shvaahōdē̍ti̠ suurya̍h ॥ 39
न ते॒ अदे॑वः प्र॒दिवो॒ नि वा॑सते॒ यदे॑त॒शेभिः॑ पत॒रै र॑थ॒र्यसि॑ ।
प्रा॒चीन॑म॒न्यदनु॑ वर्तते॒ रज॒ उद॒न्येन॒ ज्योति॑षा यासि सूर्य ॥ 40
na tē̠ adē̍vaḥ pra̠divō̠ ni vā̍satē̠ yadē̍ta̠śēbhi̍ḥ pata̠rai ra̍tha̠ryasi̍ ।
prā̠chīna̍ma̠nyadanu̍ vartatē̠ raja̠ uda̠nyēna̠ jyōti̍ṣā yāsi sūrya ॥ 40
na tē̠ adē̍vah pra̠divō̠ ni vaa̍satē̠ yadē̍ta̠shēbhi̍h pata̠rai ra̍tha̠ryasi̍ ।
praa̠chiina̍ma̠nyadanu̍ vartatē̠ raja̠ uda̠nyēna̠ jyōti̍shaa yaasi suurya ॥ 40
येन॑ सूर्य॒ ज्योति॑षा॒ बाध॑से॒ तमो॒ जग॑च्च॒ विश्व॑मुदि॒यर्षि॑ भा॒नुना॑ ।
तेना॒स्मद्विश्वा॒मनि॑रा॒मना॑हुति॒मपामी॑वा॒मप॑ दु॒ष्वप्न्यं॑ सुव ॥ 41
yēna̍ sūrya̠ jyōti̍ṣā̠ bādha̍sē̠ tamō̠ jaga̍chcha̠ viśva̍mudi̠yarṣi̍ bhā̠nunā̍ ।
tēnā̠smadviśvā̠mani̍rā̠manā̍huti̠mapāmī̍vā̠mapa̍ du̠ṣvapnyaṃ̍ suva ॥ 41
yēna̍ suurya̠ jyōti̍shaa̠ baadha̍sē̠ tamō̠ jaga̍chcha̠ vishva̍mudi̠yarshi̍ bhaa̠nunaa̍ ।
tēnaa̠smadvishvaa̠mani̍raa̠manaa̍huti̠mapaamii̍vaa̠mapa̍ du̠shvapnyam̍ suva ॥ 41
विश्व॑स्य॒ हि प्रेषि॑तो॒ रक्ष॑सि व्र॒तमहे॑लयन्नु॒च्चर॑सि स्व॒धा अनु॑ ।
यद॒द्य त्वा॑ सूर्योप॒ब्रवा॑महै॒ त-न्नो॑ दे॒वा अनु॑ मंसीरत॒ क्रतु॑म् ॥ 42
viśva̍sya̠ hi prēṣi̍tō̠ rakṣa̍si vra̠tamahē̍ḻayannu̠chchara̍si sva̠dhā anu̍ ।
yada̠dya tvā̍ sūryōpa̠bravā̍mahai̠ ta-nnō̍ dē̠vā anu̍ maṃsīrata̠ kratu̍m ॥ 42
vishva̍sya̠ hi prēshi̍tō̠ raksha̍si vra̠tamahē̍ḻayannu̠chchara̍si sva̠dhaa anu̍ ।
yada̠dya tvaa̍ suuryōpa̠bravaa̍mahai̠ ta-nnō̍ dē̠vaa anu̍ mamsiirata̠ kratu̍m ॥ 42
त-न्नो॒ द्यावा॑पृथि॒वी तन्न॒ आप॒ इन्द्रः॑ शृण्वन्तु म॒रुतो॒ हवं॒ वचः॑ ।
मा शूने॑ भूम॒ सूर्य॑स्य स॒न्दृशि॑ भ॒द्र-ञ्जीव॑न्तो जर॒णाम॑शीमहि ॥ 43
ta-nnō̠ dyāvā̍pṛthi̠vī tanna̠ āpa̠ indra̍-śśṛṇvantu ma̠rutō̠ havaṃ̠ vacha̍ḥ ।
mā śūnē̍ bhūma̠ sūrya̍sya sa̠ndṛśi̍ bha̠dra-ñjīva̍ntō jara̠ṇāma̍śīmahi ॥ 43
ta-nnō̠ dyaavaa̍prithi̠vii tanna̠ aapa̠ indra̍-shshrinvantu ma̠rutō̠ havam̠ vacha̍h ।
maa shuunē̍ bhuuma̠ suurya̍sya sa̠ndrishi̍ bha̠dra-njiiva̍ntō jara̠naama̍shiimahi ॥ 43
वि॒श्वाहा॑ त्वा सु॒मन॑स-स्सु॒चक्ष॑सः प्र॒जाव॑न्तो अनमी॒वा अना॑गसः ।
उ॒द्यन्तं॑ त्वा मित्रमहो दि॒वेदि॑वे॒ ज्योग्जी॒वाः प्रति॑ पश्येम सूर्य ॥ 44
vi̠śvāhā̍ tvā su̠mana̍sa-ssu̠chakṣa̍saḥ pra̠jāva̍ntō anamī̠vā anā̍gasaḥ ।
u̠dyantaṃ̍ tvā mitramahō di̠vēdi̍vē̠ jyōgjī̠vāḥ prati̍ paśyēma sūrya ॥ 44
vi̠shvaahaa̍ tvaa su̠mana̍sa-ssu̠chaksha̍sah pra̠jaava̍ntō anamii̠vaa anaa̍gasah ।
u̠dyantam̍ tvaa mitramahō di̠vēdi̍vē̠ jyōgjii̠vaah prati̍ pashyēma suurya ॥ 44
महि॒ ज्योति॒र्बिभ्र॑त-न्त्वा विचक्षण॒ भास्व॑न्तं॒ चक्षु॑षे चक्षुषे॒ मयः॑ ।
आ॒रोह॑न्त-म्बृह॒तः पाज॑स॒स्परि॑ व॒य-ञ्जी॒वाः प्रति॑ पश्येम सूर्य ॥ 45
mahi̠ jyōti̠rbibhra̍ta-ntvā vichakṣaṇa̠ bhāsva̍ntaṃ̠ chakṣu̍ṣē chakṣuṣē̠ maya̍ḥ ।
ā̠rōha̍nta-mbṛha̠taḥ pāja̍sa̠spari̍ va̠ya-ñjī̠vāḥ prati̍ paśyēma sūrya ॥ 45
mahi̠ jyōti̠rbibhra̍ta-ntvaa vichakshana̠ bhaasva̍ntam̠ chakshu̍shē chakshushē̠ maya̍h ।
aa̠rōha̍nta-mbriha̠tah paaja̍sa̠spari̍ va̠ya-njii̠vaah prati̍ pashyēma suurya ॥ 45
यस्य॑ ते॒ विश्वा॒ भुव॑नानि के॒तुना॒ प्र चेर॑ते॒ नि च॑ वि॒शन्ते॑ अ॒क्तुभिः॑ ।
अ॒ना॒गा॒स्त्वेन॑ हरिकेश सू॒र्याह्ना॑ह्ना नो॒ वस्य॑सावस्य॒सोदि॑हि ॥ 46
yasya̍ tē̠ viśvā̠ bhuva̍nāni kē̠tunā̠ pra chēra̍tē̠ ni cha̍ vi̠śantē̍ a̠ktubhi̍ḥ ।
a̠nā̠gā̠stvēna̍ harikēśa sū̠ryāhnā̍hnā nō̠ vasya̍sāvasya̠sōdi̍hi ॥ 46
yasya̍ tē̠ vishvaa̠ bhuva̍naani kē̠tunaa̠ pra chēra̍tē̠ ni cha̍ vi̠shantē̍ a̠ktubhi̍h ।
a̠naa̠gaa̠stvēna̍ harikēsha suu̠ryaahnaa̍hnaa nō̠ vasya̍saavasya̠sōdi̍hi ॥ 46
श-न्नो॑ भव॒ चक्ष॑सा॒ श-न्नो॒ अह्ना॒ श-म्भा॒नुना॒ शं हि॒मा श-ङ्घृ॒णेन॑ ।
यथा॒ शमध्व॒ञ्छमस॑द्दुरो॒णे तत्सू॑र्य॒ द्रवि॑ण-न्धेहि चि॒त्रम् ॥ 47
śa-nnō̍ bhava̠ chakṣa̍sā̠ śa-nnō̠ ahnā̠ śa-mbhā̠nunā̠ śaṃ hi̠mā śa-ṅghṛ̠ṇēna̍ ।
yathā̠ śamadhva̠ñChamasa̍ddurō̠ṇē tatsū̍rya̠ dravi̍ṇa-ndhēhi chi̠tram ॥ 47
sha-nnō̍ bhava̠ chaksha̍saa̠ sha-nnō̠ ahnaa̠ sha-mbhaa̠nunaa̠ sham hi̠maa sha-nghri̠nēna̍ ।
yathaa̠ shamadhva̠nChamasa̍ddurō̠nē tatsuu̍rya̠ dravi̍na-ndhēhi chi̠tram ॥ 47
अ॒स्माकं॑ देवा उ॒भया॑य॒ जन्म॑ने॒ शर्म॑ यच्छत द्वि॒पदे॒ चतु॑ष्पदे ।
अ॒दत्पिब॑दू॒र्जय॑मान॒माशि॑तं॒ तद॒स्मे शं-योँर॑र॒पो द॑धातन ॥ 48
a̠smākaṃ̍ dēvā u̠bhayā̍ya̠ janma̍nē̠ śarma̍ yachChata dvi̠padē̠ chatu̍ṣpadē ।
a̠datpiba̍dū̠rjaya̍māna̠māśi̍taṃ̠ tada̠smē śaṃ yōra̍ra̠pō da̍dhātana ॥ 48
a̠smaakam̍ dēvaa u̠bhayaa̍ya̠ janma̍nē̠ sharma̍ yachChata dvi̠padē̠ chatu̍shpadē ।
a̠datpiba̍duu̠rjaya̍maana̠maashi̍tam̠ tada̠smē sham yōra̍ra̠pō da̍dhaatana ॥ 48
यद्वो॑ देवाश्चकृ॒म जि॒ह्वया॑ गु॒रु मन॑सो वा॒ प्रयु॑ती देव॒हेल॑नम् ।
अरा॑वा॒ यो नो॑ अ॒भि दु॑च्छुना॒यते॒ तस्मि॒न्तदेनो॑ वसवो॒ नि धे॑तन ॥ 49
yadvō̍ dēvāśchakṛ̠ma ji̠hvayā̍ gu̠ru mana̍sō vā̠ prayu̍tī dēva̠hēḻa̍nam ।
arā̍vā̠ yō nō̍ a̠bhi du̍chChunā̠yatē̠ tasmi̠ntadēnō̍ vasavō̠ ni dhē̍tana ॥ 49
yadvō̍ dēvaashchakri̠ma ji̠hvayaa̍ gu̠ru mana̍sō vaa̠ prayu̍tii dēva̠hēḻa̍nam ।
araa̍vaa̠ yō nō̍ a̠bhi du̍chChunaa̠yatē̠ tasmi̠ntadēnō̍ vasavō̠ ni dhē̍tana ॥ 49
(10-158-01)
सूर्यो॑ नो दि॒वस्पा॑तु॒ वातो॑ अ॒न्तरि॑क्षात् ।
अ॒ग्निर्नः॒ पार्थि॑वेभ्यः ॥ 50
(10-158-01)
sūryō̍ nō di̠vaspā̍tu̠ vātō̍ a̠ntari̍kṣāt ।
a̠gnirna̠ḥ pārthi̍vēbhyaḥ ॥ 50
(10-158-01)
suuryō̍ nō di̠vaspaa̍tu̠ vaatō̍ a̠ntari̍kshaat ।
a̠gnirna̠h paarthi̍vēbhyah ॥ 50
जोषा॑ सवित॒र्यस्य॑ ते॒ हरः॑ श॒तं स॒वाँ अर्ह॑ति ।
पा॒हि नो॑ दि॒द्युतः॒ पत॑न्त्याः ॥ 51
jōṣā̍ savita̠ryasya̍ tē̠ hara̍-śśa̠taṃ sa̠vām̐ arha̍ti ।
pā̠hi nō̍ di̠dyuta̠ḥ pata̍ntyāḥ ॥ 51
jōshaa̍ savita̠ryasya̍ tē̠ hara̍-shsha̠tam sa̠vaam arha̍ti ।
paa̠hi nō̍ di̠dyuta̠h pata̍ntyaah ॥ 51
चक्षु॑र्नो दे॒व-स्स॑वि॒ता चक्षु॑र्न उ॒त पर्व॑तः ।
चक्षु॑र्धा॒ता द॑धातु नः ॥ 52
chakṣu̍rnō dē̠va-ssa̍vi̠tā chakṣu̍rna u̠ta parva̍taḥ ।
chakṣu̍rdhā̠tā da̍dhātu naḥ ॥ 52
chakshu̍rnō dē̠va-ssa̍vi̠taa chakshu̍rna u̠ta parva̍tah ।
chakshu̍rdhaa̠taa da̍dhaatu nah ॥ 52
चक्षु॑र्नो धेहि॒ चक्षु॑षे॒ चक्षु॑र्वि॒ख्यै त॒नूभ्यः॑ ।
स-ञ्चे॒दं-विँ च॑ पश्येम ॥ 53
chakṣu̍rnō dhēhi̠ chakṣu̍ṣē̠ chakṣu̍rvi̠khyai ta̠nūbhya̍ḥ ।
sa-ñchē̠daṃ vi cha̍ paśyēma ॥ 53
chakshu̍rnō dhēhi̠ chakshu̍shē̠ chakshu̍rvi̠khyai ta̠nuubhya̍h ।
sa-nchē̠dam vi cha̍ pashyēma ॥ 53
सु॒स॒न्दृशं॑ त्वा व॒य-म्प्रति॑ पश्येम सूर्य ।
वि प॑श्येम नृ॒चक्ष॑सः ॥ 54
su̠sa̠ndṛśaṃ̍ tvā va̠ya-mprati̍ paśyēma sūrya ।
vi pa̍śyēma nṛ̠chakṣa̍saḥ ॥ 54
su̠sa̠ndrisham̍ tvaa va̠ya-mprati̍ pashyēma suurya ।
vi pa̍shyēma nri̠chaksha̍sah ॥ 54
(10-170-01)
वि॒भ्राड्बृ॒हत्पि॑बतु सो॒म्य-म्मध्वायु॒र्दध॑द्य॒ज्ञप॑ता॒ववि॑ह्रुतम् ।
वात॑जूतो॒ यो अ॑भि॒रक्ष॑ति॒ त्मना॑ प्र॒जाः पु॑पोष पुरु॒धा वि रा॑जति ॥ 55
(10-170-01)
vi̠bhrāḍbṛ̠hatpi̍batu sō̠mya-mmadhvāyu̠rdadha̍dya̠jñapa̍tā̠vavi̍hrutam ।
vāta̍jūtō̠ yō a̍bhi̠rakṣa̍ti̠ tmanā̍ pra̠jāḥ pu̍pōṣa puru̠dhā vi rā̍jati ॥ 55
(10-170-01)
vi̠bhraadbri̠hatpi̍batu sō̠mya-mmadhvaayu̠rdadha̍dya̠jnapa̍taa̠vavi̍hrutam ।
vaata̍juutō̠ yō a̍bhi̠raksha̍ti̠ tmanaa̍ pra̠jaah pu̍pōsha puru̠dhaa vi raa̍jati ॥ 55
वि॒भ्राड्बृ॒हत्सुभृ॑तं-वाँज॒सात॑मं॒ धर्म॑न्दि॒वो ध॒रुणे॑ स॒त्यमर्पि॑तम् ।
अ॒मि॒त्र॒हा वृ॑त्र॒हा द॑स्यु॒हन्त॑मं॒ ज्योति॑र्जज्ञे असुर॒हा स॑पत्न॒हा ॥ 56
vi̠bhrāḍbṛ̠hatsubhṛ̍taṃ vāja̠sāta̍maṃ̠ dharma̍ndi̠vō dha̠ruṇē̍ sa̠tyamarpi̍tam ।
a̠mi̠tra̠hā vṛ̍tra̠hā da̍syu̠hanta̍maṃ̠ jyōti̍rjajñē asura̠hā sa̍patna̠hā ॥ 56
vi̠bhraadbri̠hatsubhri̍tam vaaja̠saata̍mam̠ dharma̍ndi̠vō dha̠runē̍ sa̠tyamarpi̍tam ।
a̠mi̠tra̠haa vri̍tra̠haa da̍syu̠hanta̍mam̠ jyōti̍rjajnē asura̠haa sa̍patna̠haa ॥ 56
इ॒दं श्रेष्ठं॒ ज्योति॑षां॒ ज्योति॑रुत्त॒मं-विँ॑श्व॒जिद्ध॑न॒जिदु॑च्यते बृ॒हत् ।
वि॒श्व॒भ्राड्भ्रा॒जो महि॒ सूर्यो॑ दृ॒श उ॒रु प॑प्रथे॒ सह॒ ओजो॒ अच्यु॑तम् ॥ 57
i̠daṃ śrēṣṭhaṃ̠ jyōti̍ṣāṃ̠ jyōti̍rutta̠maṃ vi̍śva̠jiddha̍na̠jidu̍chyatē bṛ̠hat ।
vi̠śva̠bhrāḍbhrā̠jō mahi̠ sūryō̍ dṛ̠śa u̠ru pa̍prathē̠ saha̠ ōjō̠ achyu̍tam ॥ 57
i̠dam shrēshtham̠ jyōti̍shaam̠ jyōti̍rutta̠mam vi̍shva̠jiddha̍na̠jidu̍chyatē bri̠hat ।
vi̠shva̠bhraadbhraa̠jō mahi̠ suuryō̍ dri̠sha u̠ru pa̍prathē̠ saha̠ ōjō̠ achyu̍tam ॥ 57
वि॒भ्राज॒ञ्ज्योति॑षा॒ स्व॒1॑रग॑च्छो रोच॒न-न्दि॒वः ।
येने॒मा विश्वा॒ भुव॑ना॒न्याभृ॑ता वि॒श्वक॑र्मणा वि॒श्वदे॑व्यावता ॥ 58
vi̠bhrāja̠ñjyōti̍ṣā̠ sva̠1̍raga̍chChō rōcha̠na-ndi̠vaḥ ।
yēnē̠mā viśvā̠ bhuva̍nā̠nyābhṛ̍tā vi̠śvaka̍rmaṇā vi̠śvadē̍vyāvatā ॥ 58
vi̠bhraaja̠njyōti̍shaa̠ sva̠1̍raga̍chChō rōcha̠na-ndi̠vah ।
yēnē̠maa vishvaa̠ bhuva̍naa̠nyaabhri̍taa vi̠shvaka̍rmanaa vi̠shvadē̍vyaavataa ॥ 58
(10-189-02)
आय-ङ्गौः पृश्नि॑रक्रमी॒दस॑दन्मा॒तरं॑ पु॒रः ।
पि॒तरं॑ च प्र॒यन्त्स्वः॑ ॥ 59
(10-189-02)
āya-ṅgauḥ pṛśni̍rakramī̠dasa̍danmā̠taraṃ̍ pu̠raḥ ।
pi̠taraṃ̍ cha pra̠yantsva̍ḥ ॥ 59
(10-189-02)
aaya-ngauh prishni̍rakramii̠dasa̍danmaa̠taram̍ pu̠rah ।
pi̠taram̍ cha pra̠yantsva̍h ॥ 59
अ॒न्तश्च॑रति रोच॒नास्य प्रा॒णाद॑पान॒ती ।
व्य॑ख्यन्महि॒षो दिव॑म् ॥ 60
a̠ntaścha̍rati rōcha̠nāsya prā̠ṇāda̍pāna̠tī ।
vya̍khyanmahi̠ṣō diva̍m ॥ 60
a̠ntashcha̍rati rōcha̠naasya praa̠naada̍paana̠tii ।
vya̍khyanmahi̠shō diva̍m ॥ 60
त्रिं॒शद्धाम॒ वि रा॑जति॒ वाक्प॑त॒ङ्गाय॑ धीयते ।
प्रति॒ वस्तो॒रह॒ द्युभिः॑ ॥ 61
triṃ̠śaddhāma̠ vi rā̍jati̠ vākpa̍ta̠ṅgāya̍ dhīyatē ।
prati̠ vastō̠raha̠ dyubhi̍ḥ ॥ 61
trim̠shaddhaama̠ vi raa̍jati̠ vaakpa̍ta̠ngaaya̍ dhiiyatē ।
prati̠ vastō̠raha̠ dyubhi̍h ॥ 61
(10-190-01)
ऋ॒त-ञ्च॑ स॒त्य-ञ्चा॒भी॑द्धा॒त्तप॒सो-ऽध्य॑जायत ।
ततो॒ रात्र्य॑जायत॒ ततः॑ समु॒द्रो अ॑र्ण॒वः ॥ 62
(10-190-01)
ṛ̠ta-ñcha̍ sa̠tya-ñchā̠bhī̍ddhā̠ttapa̠sō-'dhya̍jāyata ।
tatō̠ rātrya̍jāyata̠ tata̍-ssamu̠drō a̍rṇa̠vaḥ ॥ 62
(10-190-01)
ri̠ta-ncha̍ sa̠tya-nchaa̠bhii̍ddhaa̠ttapa̠sō-'dhya̍jaayata ।
tatō̠ raatrya̍jaayata̠ tata̍-ssamu̠drō a̍rna̠vah ॥ 62
स॒मु॒द्राद॑र्ण॒वादधि॑ संवँत्स॒रो अ॑जायत ।
अ॒हो॒रा॒त्राणि॑ वि॒दध॒द्विश्व॑स्य मिष॒तो व॒शी ॥ 63
sa̠mu̠drāda̍rṇa̠vādadhi̍ saṃvatsa̠rō a̍jāyata ।
a̠hō̠rā̠trāṇi̍ vi̠dadha̠dviśva̍sya miṣa̠tō va̠śī ॥ 63
sa̠mu̠draada̍rna̠vaadadhi̍ samvatsa̠rō a̍jaayata ।
a̠hō̠raa̠traani̍ vi̠dadha̠dvishva̍sya misha̠tō va̠shii ॥ 63
सू॒र्या॒च॒न्द्र॒मसौ॑ धा॒ता य॑थापू॒र्वम॑कल्पयत् ।
दिवं॑ च पृथि॒वी-ञ्चा॒न्तरि॑क्ष॒मथो॒ स्वः॑ ॥ 64
sū̠ryā̠cha̠ndra̠masau̍ dhā̠tā ya̍thāpū̠rvama̍kalpayat ।
divaṃ̍ cha pṛthi̠vī-ñchā̠ntari̍kṣa̠mathō̠ sva̍ḥ ॥ 64
suu̠ryaa̠cha̠ndra̠masau̍ dhaa̠taa ya̍thaapuu̠rvama̍kalpayat ।
divam̍ cha prithi̠vii-nchaa̠ntari̍ksha̠mathō̠ sva̍h ॥ 64
(10-036-14)
स॒वि॒ता प॒श्चाता॑त्सवि॒ता पु॒रस्ता॑त्सवि॒तोत्त॒रात्ता॑त्सवि॒ताध॒रात्ता॑त् ।
स॒वि॒ता नः॑ सुवतु स॒र्वता॑तिं सवि॒ता नो॑ रासता-न्दी॒र्घमायुः॑ ॥ 65
(10-036-14)
sa̠vi̠tā pa̠śchātā̍tsavi̠tā pu̠rastā̍tsavi̠tōtta̠rāttā̍tsavi̠tādha̠rāttā̍t ।
sa̠vi̠tā na̍-ssuvatu sa̠rvatā̍tiṃ savi̠tā nō̍ rāsatā-ndī̠rghamāyu̍ḥ ॥ 65
(10-036-14)
sa̠vi̠taa pa̠shchaataa̍tsavi̠taa pu̠rastaa̍tsavi̠tōtta̠raattaa̍tsavi̠taadha̠raattaa̍t ।
sa̠vi̠taa na̍-ssuvatu sa̠rvataa̍tim savi̠taa nō̍ raasataa-ndii̠rghamaayu̍h ॥ 65
इति महासौरमन्त्रः ।
iti mahāsauramantraḥ ।
iti mahaasauramantrah ।