अश्वतर उवाच ।
जगद्धात्रीमहं देवीमारिराधयिषुः शुभाम् ।
स्तोष्ये प्रणम्य शिरसा ब्रह्मयोनिं सरस्वतीम् ॥ 1 ॥
aśvatara uvācha ।
jagaddhātrīmahaṃ dēvīmārirādhayiṣuḥ śubhām ।
stōṣyē praṇamya śirasā brahmayōniṃ sarasvatīm ॥ 1 ॥
ashvatara uvaacha ।
jagaddhaatriimaham deviimaariraadhayishuh shubhaam ।
stoshye pranamya shirasaa brahmayonim sarasvatiim ॥ 1 ॥
सदसद्देवि यत्किञ्चिन्मोक्षवच्चार्थवत्पदम् ।
तत्सर्वं त्वय्यसंयोगं योगवद्देवि संस्थितम् ॥ 2 ॥
sadasaddēvi yatkiñchinmōkṣavachchārthavatpadam ।
tatsarvaṃ tvayyasaṃyōgaṃ yōgavaddēvi saṃsthitam ॥ 2 ॥
sadasaddevi yatkinchinmokshavachchaarthavatpadam ।
tatsarvam tvayyasamyogam yogavaddevi samsthitam ॥ 2 ॥
त्वमक्षरं परं देवि यत्र सर्वं प्रतिष्ठितम् ।
अक्षरं परमं देवि संस्थितं परमाणुवत् ॥ 3 ॥
tvamakṣaraṃ paraṃ dēvi yatra sarvaṃ pratiṣṭhitam ।
akṣaraṃ paramaṃ dēvi saṃsthitaṃ paramāṇuvat ॥ 3 ॥
tvamaksharam param devi yatra sarvam pratishthitam ।
aksharam paramam devi samsthitam paramaanuvat ॥ 3 ॥
अक्षरं परमं ब्रह्म विश्वञ्चैतत्क्षरात्मकम् ।
दारुण्यवस्थितो वह्निर्भौमाश्च परमाणवः ॥ 4 ॥
akṣaraṃ paramaṃ brahma viśvañchaitatkṣarātmakam ।
dāruṇyavasthitō vahnirbhaumāścha paramāṇavaḥ ॥ 4 ॥
aksharam paramam brahma vishvanchaitatksharaatmakam ।
daarunyavasthito vahnirbhaumaashcha paramaanavah ॥ 4 ॥
तथा त्वयि स्थितं ब्रह्म जगच्चेदमशेषतः ।
ओङ्काराक्षरसंस्थानं यत्तु देवि स्थिरास्थिरम् ॥ 5 ॥
tathā tvayi sthitaṃ brahma jagachchēdamaśēṣataḥ ।
ōṅkārākṣarasaṃsthānaṃ yattu dēvi sthirāsthiram ॥ 5 ॥
tathaa tvayi sthitam brahma jagachchedamasheshatah ।
onkaaraaksharasamsthaanam yattu devi sthiraasthiram ॥ 5 ॥
तत्र मात्रात्रयं सर्वमस्ति यद्देवि नास्ति च ।
त्रयो लोकास्त्रयो वेदास्त्रैविद्यं पावकत्रयम् ॥ 6 ॥
tatra mātrātrayaṃ sarvamasti yaddēvi nāsti cha ।
trayō lōkāstrayō vēdāstraividyaṃ pāvakatrayam ॥ 6 ॥
tatra maatraatrayam sarvamasti yaddevi naasti cha ।
trayo lokaastrayo vedaastraividyam paavakatrayam ॥ 6 ॥
त्रीणि ज्योतींषि वर्णाश्च त्रयो धर्मागमास्तथा ।
त्रयो गुणास्त्रयः शब्दस्त्रयो वेदास्तथाश्रमाः ॥ 7 ॥
trīṇi jyōtīṃṣi varṇāścha trayō dharmāgamāstathā ।
trayō guṇāstrayaḥ śabdastrayō vēdāstathāśramāḥ ॥ 7 ॥
triini jyotiimshi varnaashcha trayo dharmaagamaastathaa ।
trayo gunaastrayah shabdastrayo vedaastathaashramaah ॥ 7 ॥
त्रयः कालास्तथावस्थाः पितरोऽहर्निशादयः ।
एतन्मात्रात्रयं देवि तव रूपं सरस्वति ॥ 8 ॥
trayaḥ kālāstathāvasthāḥ pitarō'harniśādayaḥ ।
ētanmātrātrayaṃ dēvi tava rūpaṃ sarasvati ॥ 8 ॥
trayah kaalaastathaavasthaah pitaro'harnishaadayah ।
etanmaatraatrayam devi tava ruupam sarasvati ॥ 8 ॥
विभिन्नदर्शिनामाद्या ब्रह्मणो हि सनातनाः ।
सोमसंस्था हविः संस्थाः पाकसंस्थाश्च सप्त याः ॥ 9 ॥
vibhinnadarśināmādyā brahmaṇō hi sanātanāḥ ।
sōmasaṃsthā haviḥ saṃsthāḥ pākasaṃsthāścha sapta yāḥ ॥ 9 ॥
vibhinnadarshinaamaadyaa brahmano hi sanaatanaah ।
somasamsthaa havih samsthaah paakasamsthaashcha sapta yaah ॥ 9 ॥
तास्त्वदुच्चारणाद्देवि क्रियन्ते ब्रह्मवादिभिः ।
अनिर्देश्यं तथा चान्यदर्धमात्रान्वितं परम् ॥ 10 ॥
tāstvaduchchāraṇāddēvi kriyantē brahmavādibhiḥ ।
anirdēśyaṃ tathā chānyadardhamātrānvitaṃ param ॥ 10 ॥
taastvaduchchaaranaaddevi kriyante brahmavaadibhih ।
anirdeshyam tathaa chaanyadardhamaatraanvitam param ॥ 10 ॥
अविकार्यक्षयं दिव्यं परिणामविवर्जितम् ।
तवैतत्परमं रूपं यन्न शक्यं मयोदितुम् ॥ 11 ॥
avikāryakṣayaṃ divyaṃ pariṇāmavivarjitam ।
tavaitatparamaṃ rūpaṃ yanna śakyaṃ mayōditum ॥ 11 ॥
avikaaryakshayam divyam parinaamavivarjitam ।
tavaitatparamam ruupam yanna shakyam mayoditum ॥ 11 ॥
न चास्येन च तज्जिह्वा ताम्रोष्ठादिभिरुच्यते ।
इन्द्रोऽपि वसवो ब्रह्मा चन्द्रार्कौ ज्योतिरेव च ॥ 12 ॥
na chāsyēna cha tajjihvā tāmrōṣṭhādibhiruchyatē ।
indrō'pi vasavō brahmā chandrārkau jyōtirēva cha ॥ 12 ॥
na chaasyena cha tajjihvaa taamroshthaadibhiruchyate ।
indro'pi vasavo brahmaa chandraarkau jyotireva cha ॥ 12 ॥
विश्वावासं विश्वरूपं विश्वेशं परमेश्वरम् ।
साङ्ख्यवेदान्तवादोक्तं बहुशाखास्थिरीकृतम् ॥ 13 ॥
viśvāvāsaṃ viśvarūpaṃ viśvēśaṃ paramēśvaram ।
sāṅkhyavēdāntavādōktaṃ bahuśākhāsthirīkṛtam ॥ 13 ॥
vishvaavaasam vishvaruupam vishvesham parameshvaram ।
saankhyavedaantavaadoktam bahushaakhaasthiriikritam ॥ 13 ॥
अनादिमध्यनिधनं सदसन्न सदेव यत् ।
एकन्त्वनेकं नाप्येकं भवभेदसमाश्रितम् ॥ 14 ॥
anādimadhyanidhanaṃ sadasanna sadēva yat ।
ēkantvanēkaṃ nāpyēkaṃ bhavabhēdasamāśritam ॥ 14 ॥
anaadimadhyanidhanam sadasanna sadeva yat ।
ekantvanekam naapyekam bhavabhedasamaashritam ॥ 14 ॥
अनाख्यं षड्गुणाख्यञ्च वर्गाख्यं त्रिगुणाश्रयम् ।
नानाशक्तिमतामेकं शक्तिवैभविकं परम् ॥ 15 ॥
anākhyaṃ ṣaḍguṇākhyañcha vargākhyaṃ triguṇāśrayam ।
nānāśaktimatāmēkaṃ śaktivaibhavikaṃ param ॥ 15 ॥
anaakhyam shadgunaakhyancha vargaakhyam trigunaashrayam ।
naanaashaktimataamekam shaktivaibhavikam param ॥ 15 ॥
सुखासुखं महासौख्यरूपं त्वयि विभाव्यते ।
एवं देवि त्वया व्याप्तं सकलं निष्कलञ्च यत् ।
अद्वैतावस्थितं ब्रह्म यच्च द्वैते व्यवस्थितम् ॥ 16 ॥
sukhāsukhaṃ mahāsaukhyarūpaṃ tvayi vibhāvyatē ।
ēvaṃ dēvi tvayā vyāptaṃ sakalaṃ niṣkalañcha yat ।
advaitāvasthitaṃ brahma yachcha dvaitē vyavasthitam ॥ 16 ॥
sukhaasukham mahaasaukhyaruupam tvayi vibhaavyate ।
evam devi tvayaa vyaaptam sakalam nishkalancha yat ।
advaitaavasthitam brahma yachcha dvaite vyavasthitam ॥ 16 ॥
येऽर्था नित्या ये विनश्यन्ति चान्ये
ये वा स्थूला ये च सूक्ष्मातिसूक्ष्माः ।
ये वा भूमौ येऽन्तरीक्षेऽन्यतो वा
तेषां तेषां त्वत्त एवोपलब्धिः ॥ 17 ॥
yē'rthā nityā yē vinaśyanti chānyē
yē vā sthūlā yē cha sūkṣmātisūkṣmāḥ ।
yē vā bhūmau yē'ntarīkṣē'nyatō vā
tēṣāṃ tēṣāṃ tvatta ēvōpalabdhiḥ ॥ 17 ॥
ye'rthaa nityaa ye vinashyanti chaanye
ye vaa sthuulaa ye cha suukshmaatisuukshmaah ।
ye vaa bhuumau ye'ntariikshe'nyato vaa
teshaam teshaam tvatta evopalabdhih ॥ 17 ॥
यच्चामूर्तं यच्च मूर्तं समस्तं
यद्वा भूतेष्वेकमेकञ्च किञ्चित् ।
यद्दिव्यस्ति क्ष्मातले खेऽन्यतो वा
त्वत्सम्बन्धं त्वत्स्वरैर्व्यञ्जनैश्च ॥ 18 ॥
yachchāmūrtaṃ yachcha mūrtaṃ samastaṃ
yadvā bhūtēṣvēkamēkañcha kiñchit ।
yaddivyasti kṣmātalē khē'nyatō vā
tvatsambandhaṃ tvatsvarairvyañjanaiścha ॥ 18 ॥
yachchaamuurtam yachcha muurtam samastam
yadvaa bhuuteshvekamekancha kinchit ।
yaddivyasti kshmaatale khe'nyato vaa
tvatsambandham tvatsvarairvyanjanaishcha ॥ 18 ॥
इति श्रीमार्कण्डेयपुराणे त्रयोविंशोऽध्याये अश्वतर प्रोक्त महासरस्वती स्तवम् ।
iti śrīmārkaṇḍēyapurāṇē trayōviṃśō'dhyāyē aśvatara prōkta mahāsarasvatī stavam ।
iti shriimaarkandeyapuraane trayovimsho'dhyaaye ashvatara prokta mahaasarasvatii stavam ।